Login
Global News Land Global News Land Blog Updated: Nov 30, 2022, 7:56pm

Louise Bennett-Coverley Poems

Looking for the Louise Bennett-Coverley Poems but not getting all the poems at a single place, don't worry here I am going to share all the quotes of Louise Bennett-Coverley Poems here. As all us know her as a popular Jamaican poet, folklorist, writer, and educator.

Louise Bennett-Coverley Poems

Let's explore all the poems of Louise Bennett-Coverley one by one.

Table of content

  1. No Lickle Twang- by Louise Bennett
  2. Colonization in Reverse- by Louise Bennett
  3. A’MERICA- by Louise Bennett
  4. Love Letter- by Louise Bennett
  5. Dutty Tough- by Louise Bennett

No Lickle Twang by Louise Bennett

No Lickle Twang- by Louise Bennett

Me glad fi see yuh come back, bwoy,
But lawd, yuh let me dung
Me shame a yuh so till all a
Me proudness drop a grung.

Yuh mean yuh go dah Merica
An spen six whole mont deh,
An come back not a piece better
Dan how yuh did go weh?

Bwoy, yuh no shame? Is so yuh come?
After yuh tan so lang!
Not even lickle language, bwoy?
Not even lickle twang?

An yuh sister what work ongle
One week wid Merican
She talk so nice now dat we have
De jooce fi understan?

Bwoy, yuh couldn improve yuhself!
An yuh get so much pay?
Yuh spen six mont a foreign, an
Come back ugly same way?

Not even a drapes trousiz, or
A pass de riddim coat?
Bwoy, not even a gole teet or
A gole chain roun yuh troat?

Suppose me laas me pass go introjooce
Yuh to a stranger
As me lamented son what lately
Come from Merica!

Dem hooda laugh after me, bwoy!
Me couldn tell dem so!
Dem hooda seh me lie, yuh wasa
Spen time back a Mocho!

No back-answer me, bwoy – yuh talk
Too bad! Shet up yuh mout!
Ah doan know how yuh an yuh puppa
Gwine to meck it out.

Ef yuh waan please him, meck him tink
Yuh bring back someting new.
Yuh always call him ‘Pa’ – dis evenin
When him comes seh ‘Poo’.

Also read: 

Colonization in Reverse- by Louise Bennett

Colonization in Reverse- by Louise Bennett

Wat a joyful news, Miss Mattie,
I feel like me heart gwine burs
Jamaica people colonizin
Englan in Reverse

Be the hundred, be de tousan
Fro country and from town,
By de ship-load, be the plane load
Jamaica is Englan boun.

Dem pour out a Jamaica,
Everybody future plan
Is fe get a big-time job
An settle in de mother lan.

What an islan! What a people!
Man an woman, old an young
Jus a pack dem bag an baggage
An turn history upside dung!

Some people doan like travel,
But fe show dem loyalty
Dem all a open up cheap-fare-
To-England agency.

An week by week dem shipping off
Dem countryman like fire,
Fe immigrate an populate
De seat a de Empire.

Oonoo see how life is funny,
Oonoo see da turnabout?
Jamaica live fe box bread
Out a English people mout’.

For wen dem ketch a Englan,
An start play dem different role,
Some will settle down to work
An some will settle fe de dole.

Jane says de dole is not too bad
Because dey paying she
Two pounds a week fe seek a job
dat suit her dignity

me say Jane will never fine work
At de rate how she dah look,
For all day she stay popn Aunt Fan couch
An read love-story book.

Wat a devilment a Englan!
Dem face war an brave de worse,
But me wondering how dem gwine stan
Colonizin in reverse.

A’MERICA- by Louise Bennett

A’MERICA- by Louise Bennett
A’MERICA- by Louise Bennett

Every seckey got him jeggeh,
Every puppy got him flea.
An yuh no smady ef you no
Got family ovah sea!

“Uncle zacky sen’ a parcel”.
“Air mail cable come from sue”,
“Sammy boat pull out dis mawnin”,
Yuh no hear sey sarah flew?”

Everybody disa talk bout
Finga-printin an passport,
Finance-board? merican council,
Airways ticket, winta-coat!

Ah wanda is wat fault dem
Fine rid po li jamaica,
Meck everybody dah lif-up
An go a merica?

Be de time yuh sey “puss-pickney”
As yuh y’eye quint, as yuh yawn,
Yuh miss smady an baps yuh hear—
¬Is Merica dem gawn!

Some a go weh fe vacation
Some a go weh fe tun “high”
Some a go fe edication,
But de whole a dem a fly!

Me ask meself “warra matta?
Me ask meself “wa meck?”
Is tidal-wave or eart’quake, or
Is storm dem dah expeck?

Jane sey she meet so much ole frien
Wen she strole dung new york,
Dat she feel like is dung king street
Or luke lane she eah walk.

Dem might call me “falla fashin”,
But wah fe do me chile?
Ef yuh no falla fashin, yuh
Wi never eena style.

Sso me dah go falla fashin,
Me dah lif-up an go weh,
Any time unoo no hear me mout.
Is merica me deh.

Love Letter- by Louise Bennett

Love Letter- by Louise Bennett

Me darlin love, me lickle dove,
Me dumplin, me gizada,
Me sweetie Sue, I goes fa you
Like how flies goes fa sugar.

As ah puts me pen to paper
An me pen-nib start fi fly
Me rememberance remember
De fus day yuh ketch me yeye!

Yuh did jus come off a tramcar,
A bus was to yuh right,
A car swips pass yuh lef aise,
An yuh tan up stiff wid fright.

Yuh jaw drop, yuh mout open,
Jus like when jackass start yawn;
Me heart go boogoo-boogoo,
An me know wha meek me bawn!

Do, no scorn me lickle letter;
No laugh after me, yaw —
Me learnin not too gran, so what
Me cyaan spell me wi draw!

De ting eena de corner wid
De freckles, is me heart;
An de plate wid yam an salfish mean
Dat we can never part.

See how me draw de two face-dem
Dah look pon one anodder?
Well, one is me an one is yuh –
Teck any one yuh rader.

Is not a cockroach foot dis,
Is a finger wid a ring!
An it mean me want fi married yuh,
Dis line is a piece of string –

Teck it put roun de weddin finger
A yuh weddin han,
Careful fi get de right size,
An den gi it to dis man.

De man is me. Now, sweet rice,
Keep swell till ah see yuh nex.
Accept me young heart while ah close
Wid love and bans a x.

Dutty Tough- by Louise Bennett

Dutty Tough- by Louise Bennett

Sun a shine but tings no bright;
Doah pot a bwile, bickle no nuff;
River flood but water scarce, yawl
Rain a fall but dutty tough.

Tings so bad dat nowadays when
Yuh ask smaddy how dem do
Dem fraid yuh tek it tell dem back,
So dem no answer yuh.

No care omuch we dah work fa
Hard-time still een we shut;
We dah fight, Hard-time a beat we,
Dem might raise we wages, but

One poun gawn awn pon we pay, an
We no feel no merriment
For ten poun gawn pon we food
An ten pound pon we rent!

Saltfish gawn up, mackerel gawn up.
Pork en beef gawn up,
An when rice and butter ready
Dem just go pon holiday!

Claht, boot, pin an needle gawn up’
Ice, bread, taxes, water-rate
Kersene ile, gasolene, gawn up;
An de poun devaluate.

De price of bread gawn up so high
Dat we haffi agree
Fi cut we yeye pon bred an all
Tun dumplin refugee

An all dem marga smaddy weh
Dah gwan like fat is sin
All dem-deh weh dah fas wid me
Ah lef dem to dumpling!

Sun a shine an pot a bwile, but
Things no bright, bickle no nuff
Rain a fall, river dah flood, but,
Water scarce and dutty tough.

Source: You can read all the poems at best-poems.net too.

Write Comments

Wow! You comment is live now...

Like what you are reading? Subscribe us for future updates...

You may also like: